هذه ( ردية ) بين الشاعرين

الشيخ الدكتور الشاعر : عائض القرني و الشاعر المبدع: تركي الميزاني

تــــركــــي الــمــيــزانــي
سلام يا رمز الأدب والدين وبحور القصيـد
ياللي بنيت أمجاد وصروح ما تمحاها السنيـن
إنت بزمنا أكبر عطايا وقتنا وأغلى الرصيد
ولا أقول غيـر الله يخليكـم ذخـر للمسلميـن

عــــائــــض الــقـــرنـــي
أهلا هلا بالشاعر المقدام والشهـم الرشيـد
في حضرتك ننثر سنابـل كادهـا والياسميـن
إليا ذكر تركي ذكرنا قصة القـول المفيـد
أقطف زهور الورد من شعره على مر السنين

تــــركــــي الــمــيــزانــي
الله يبارك فيك ياللـي كلمـا زادوا تزيـد
وتبني من الأشعار ما تذهل عقـول السامعيـن
النار فاتح بابها والموت في حبـل الوريـد
لكن متى تصحـى قلـوب الغافليـن النايميـن

عــــائــــض الــقـــرنـــي
ذكرتني بالنابغة والبحتـري وابـن العميـد
مجالس المأمون فـي بغـداد وأيـام الأميـن
معاوية نمدح علومه مير ما نمـدح يزيـد
وش لون نمدح من توهق حيل في قتل الحسين

تــــركــــي الــمــيــزانــي
هذي شهادة والشهادة منك يـا دكتـور عيـد
نبي نعلقهـا علـى جـدار الزمـن للتابعيـن
أحد بها الدنيا شقي و أحد بها الدنيـا سعيـد
تمـر دورات الزمـن والعاقـبـة للمتقـيـن

عــــائــــض الــقـــرنـــي
أبي أرسل الأشواق لكن كيف يحملها البريد
أحسن نوصلها وليلـة عيـد شـوق الطيبيـن
أرجوك خبّر كل مخذول وشيطـان مريـد
قبر الغـزاة ديارنـا وحنـا عيـال الفاتحيـن

تــــركــــي الــمــيــزانــي
ضاعت حلول المشكلة يا شيخنا مابه جديـد
إلا غرور أهل اليسار وصمت أصحاب اليمين
مدري نقول لما مضى من وقتنا ليته يعيـد
وإلا عليك نهل كل الدمـع يـا بـدر وحنيـن

عــــائــــض الــقـــرنـــي
اليآس ذنب وعندنا أحفاد المثنـى والوليـد
والشبل من ذاك الأسد وأرض الوطن كله عرين
من يعتصم بالله ربه عاش في عمره سعيـد
يبشر بحفظ الله له ويكون في حصن حصيـن

تــــركــــي الــمــيــزانــي
حنا بلشنا بالقريب اللي عرض دون البعيـد
يا صعبها لا حولت ما بين خشم وبيـن عيـن
الجرح مبطي مابرى والصبر ذاب مع الجليد
ولا أقول غير الله يعين القانتيـن الصابريـن

عــــائــــض الــقـــرنـــي
حنا تعودنا على طحن الحجـارة والحديـد
ولا نخـاف المـوت لنّـا للجنـان مسافريـن
عدونا والله مـا يحميـه زيـد ولا عبيـد
على جماجمهم نشيـد مجدنـا الباهـي المتيـن